Vdekja e dy personave brenda viles në Pejë, Prokuroria: Janë siguruar prova e identifikuar dëshmitarë

Pejë, 30 dhjetor 2025 20:26

Dy persona janë gjetur të vdekur brenda një vile në Pejë.

Lidhur me këtë rast, zëdhënësi i Prokurorisë Themelore të Pejës, Shkodran Nikçi, ka bërë të ditur se në vendin e ngjarjes janë siguruar prova që do të përdoren në hetimet e mëtejshme.

Gjithashtu, ai bëri të ditur se janë identifikuar dëshmitarët dhe po kryhen veprimet e nevojshme për të sqaruar rrethanat e ngjarjes.

“Me të pranuar informatën menjëherë kanë dalë në vendin e ngjarjes Policia e Kosovës, dyshohet se ishin pa shenje jete në një motel. Në vendin e ngjarjes kanë dalë kryeprokurorja e Prokurorisë Themelore të Pejës dhe prokurorja e Krimeve të Rënda dhe janë ndërmarrë të gjitha veprimet në vendin e ngjarjes duke siguruar provat të cilat do të shërbejnë në veprimet e mëtutjeshme. Njëkohësisht janë identifikuar dëshmitarë, është ftuar Mjekësia Ligjore për t’i tërhequr trupat e pajetë dhe me urdhër të shtetit të bëhet autopsia. Për shkak të ndjeshmërisë së rastit nuk mund të jepen detaje më shumë”, tha Nikçi.

Ndërkohë, rasti është konfirmuar edhe nga Policia e Kosovës.

Zëdhënësi i Policisë për rajonin e Pejës, Fadil Gashi, konfirmoi se vdekjen e viktimave është konstatuar mjeku kujdestar.