Arrestohen një shtetas jordanez dhe një shtetase turke, dyshohen për kontrabandë me migrantë

Prishtinë, 24 dhjetor 2025 06:36

Policia e Kosovës ka arrestuar dy persona, një shtetas jordanez dhe një shtetase turke, nën dyshimin për përfshirje në veprën penale “Kontrabandim me migrantë”.

Sipas njoftimit, arrestimet janë kryer të martën nga Sektori i Hetimeve i Departamentit për Kufirin, në bashkëpunim dhe me asistencë të Agjencisë së Kosovës për Inteligjencë (AKI), pas disa muajsh monitorimi.

Bazuar në të dhënat hetimore, shtetasi jordanez dyshohet se ka qenë udhëheqës i një grupi kriminal të mirëorganizuar, i cili ka organizuar ardhjen e shtetasve të huaj, kryesisht nga vendet e Lindjes së Mesme dhe Azia, me qëllim të hyrjes së tyre në Kosovë. Më pas, migrantët dyshohet se kontrabandoheshin drejt vendeve të Bashkimit Evropian.

Hetimet tregojnë se grupi kriminal ka përfituar mjete të konsiderueshme financiare nga kjo veprimtari e paligjshme. Gjatë kontrollit ndaj të dyshuarit kryesor, Policia ka konfiskuar 53 pasaporta të shtetasve jordanezë, të cilat dyshohet se janë përdorur për realizimin e aktivitetit kriminal.

Lidhur me rastin është njoftuar prokuroria kompetente, me vendim të së cilës dy të dyshuarit janë dërguar në ndalim për 48 orë, ndërsa hetimet për rastin po vazhdojnë.