Vendvotimet për zgjedhjet për kryetarë komunash janë hapur në 18 komuna

Prishtinë 09 Nëntor 2025

Janë hapur vendvotimet për zgjedhjet për kryetarë në 18 komuna
Janë hapur vendvotimet për zgjedhjet për kryetarë në 18 komuna. Gazetarët e RTK-së nga komunat ku po votohet raportojnë se procesi po ecën mirë dhe deri më tani nuk është shënuar asnjë problem.
Radoniqi apelon për respektim të rregullave dhe ligjit

Kryetari i Komisionit Qendror të Zgjedhjeve (KQZ), Kreshnik Radoniqi, ka votuar në shkollën fillore “Lidhja e Prizrenit” në Pejë dhe pas votimit ka ftuar qytetarët që të dalin në zgjedhje. Ai gjithashtu ka bërë apel që të respektohen rregullat dhe ligjet në mënyrë që procesi i votimit të kalojë qetë dhe pa probleme.

Kryetari i KQZ-së ka deklaruar se gjithçka është gati për votimin e sotëm. Ai ka ftuar qytetarët e 18 komunave ku po zhvillohet raundi i dytë i zgjedhjeve që të shfrytëzojnë të drejtën e tyre të votës.

> “Dërgoj apel që të respektohen rregullat, ligji i KQZ-së dhe rendi. Dëshiroj t’i ftoj edhe anëtarët e vendvotimeve që të respektojnë rregullat dhe që i gjithë procesi të kalojë pa asnjë problem. Shpresoj që do të kemi një ditë të qetë dhe të mirë,” tha Radoniqi.
Ai foli edhe për çështjen e votimit me asistencë:

“Sa i përket votimit me asistencë, KQZ-ja ka ndërmarrë të gjitha hapat dhe procedurat e nevojshme, si dhe një udhëzues trajnimi, në të cilin janë përcaktuar qartë udhëzimet për atë që ndodh ditën e zgjedhjeve në vendvotime. E gjithë kjo mbetet në kompetencë të komisioneve komunale të zgjedhjeve. Ne kemi theksuar qartë se në disa vendvotime numri i votimeve me asistencë ka qenë shumë i lartë, dhe në disa raste arsyetimet nuk janë regjistruar siç duhet në librat e votimit. Për këtë arsye kemi shprehur shqetësimin tonë dhe shpresojmë që sot këshillat e vendvotimeve do të jenë më të kujdesshme. Natyrisht, jo secili është i autorizuar të votojë me asistencë,” theksoi kryetari i KQZ-së, Kreshnik Radoniqi.

Sot mbahet raundi i dytë i zgjedhjeve për kryetarë në 18 komuna

Sot qytetarët e Kosovës në 18 komuna dalin përsëri në votime për të zgjedhur kryetarët e rinj të komunave në raundin e dytë të zgjedhjeve lokale. Ndërkohë, dje Komisioni Qendror i Zgjedhjeve ka kryer shpërndarjen e materialit zgjedhor për këtë proces.

Komunat ku po zhvillohet raundi i dytë janë: Prishtina, Prizreni, Gjakova, Gjilani, Dragashi, Kaçaniku, Klina, Fushë Kosova, Mitrovica e Jugut, Obiliqi, Rahoveci, Peja, Suhareka, Vitia, Vushtrria, Juniku, Mamusha dhe Kllokoti.

Zgjedhjet lokale janë mbajtur më 12 tetor, por asnjë kandidat në këto 18 komuna nuk ka fituar shumicën e nevojshme në raundin e parë, prandaj procesi po vazhdon në raundin e dytë.

KQZ-ja ka njoftuar se ka kryer të gjitha përgatitjet teknike dhe ka hartuar planin operativ për ditën e sotme të zgjedhjeve.

Gjithashtu, KQZ-ja ka njoftuar se u ka vënë në dispozicion qytetarëve dhe vëzhguesve disa linja telefonike për raportimin e parregullsive dhe për marrjen e informatave ose udhëzimeve lidhur me procesin zgjedhor.