KQZ certifikon rezultatet përfundimtare për kryetarë në 35 komuna

Prishtinë, 3 nëntor 2025

Komisioni Qendror i Zgjedhjeve ka certifikuar rezultatet përfundimtare për kryetarë komunash për 35 komuna, rezultate këto të dala nga zgjedhjet lokale të 12 tetorit.

Për këto 35 komuna rezultatet përfundimtare ishin shpallur më 25 tetor, por jo edhe për Prishtinën, Junikun e Mamushën, rezultatet  të cilave përfundimtare të së cilave u shpallen sot nga KQZ-ja.

KQZ-ja thotë se ky vendim vjen pas konfirmimit nga PZAP se është përmbyllur vendimmarrja lidhur me procesin e ankesave për këto komuna.

Gjithashtu me 10 vota për, Komisioni Qendror i Zgjedhjeve ka shpallur rezultatet përfundimtare për anëtarë të 37 Kuvendeve Komunale, por jo edhe për Drenasin, meqë sipas kreut të KQZ-së, Kreshnik Radoniqi, për këtë komunë ende ka një ankesë që po trajtohet nga Gjykata Supreme.

“Një njoftim të shkurtër,  sot nuk mund ta bëjmë shpalljen e rezultatit për Drenasin për Kuvende Komunale meqë ende është një ankesë në Gjykatën Supreme. Andaj, sapo të kemi vendimin dhe varësisht nga vendimmarrja, edhe KQZ do të veprojë”, tha Radoniqi.

E pikërisht ankesat e shumta, sipas Radoniqit kishin pamundësuar shpalljen e rezultateve që KQZ-ja sipas tij, i kishte qysh në javën e dytë pas mbajtjes së zgjedhjeve.

“Sa i përket KQZ-së, rezultatet kanë qenë gati qysh javën e dytë pas ditës së zgjedhjeve, por për shkak të ankesave të shumta që ka pasur në PZAP e në Gjykatën Supreme, ne e kemi pasur të pamundur të bëjmë shpalljen e këtyre rezultateve”, sqaroi Radoniqi.

Ndërkohë, sot ka nisur zyrtarisht fushata për raundin e dytë të zgjedhjeve në garën për kryetar komunash që do të zhvillohet më 9 nëntor.

Raundi i dytë i zgjedhjeve për kryetarë komunash do të zhvillohet në 18 komuna: Gjakovë, Gjilan, Dragash, Kaçanik, Klinë, Fushë Kosovë, Mitrovicë e Jugut, Obiliq, Rahovec, Pejë, Prishtinë, Prizren, Suharekë, Viti, Vushtrri, Junik, Mamushë dhe Kllokot.