Një serb në Leposaviq plagoset nga xhandarmëria serbe dhe rrëmbehet për në Serbi

Prishtinë 03 Nëntor 2025

Policia e Kosovës ka bërë të ditur se më 1 nëntor një shtetas i Kosovës është plagosur në Leposaviq nga persona që dyshohet se i përkasin xhandarmërisë serbe.

Sipas komunikatës së Policisë së Kosovës personat e maskuar kishin hyrë në territorin e Kosovës ku kishin plagosur dhe rrëmbyer M.V të cilin e kanë dërguar në territorin e Serbisë.

“Vendi i ngjarjes ku raportohet se ka ndodhur rasti dyshohet se gjendet brenda territorit të Republikës së Kosovës, pra brenda hapësirës (siç quhet pika zero -0-), në afërsi të zonës së Leposaviqit, në mes të Republikës së Kosovës dhe Serbisë, ku për këtë Policia e Kosovës ka njoftuar dhe ka bashkëpunuar me KFOR-in, si përgjegjëse për zonën/brezin kufitar. Policia e Kosovës, Drejtoria për Hetimin e Krimit të Organizuar dhe Krimeve të Rënda, ka ndërmarrë veprimet e saja hetimore, duke intervistuar dëshmitarë të rastit, përmes të cilëve janë siguruar informacione se disa persona të maskuar kishin hyrë në territorin e Republikës së Kosovës, duke e plagosur dhe rrëmbyer viktimën të cilët pastaj e kishin dërguar në territorin e Serbisë, ku sipas dëshmitarëve me një autoambulancë e kanë dërguar në drejtim të qytetit të Nishit në Serbi, thuhet në komunikatën e Policisë së Kosovës.

Policia e Kosovës ka thënë se ka ndërmarrë të gjitha veprimet e nevojshme, në bashkëpunim dhe koordinim me institucionet relevante dhe me organet e drejtësisë, ku në konsultim me prokuroren kompetente të Prokurorisë Themelore në Mitrovicë, Departamenti për Krime të Rënda, është iniciuar rasti.