KQZ: Procesi i votimit ka nisur me kohë në të gjitha qendrat

Prishtinë 12 Tetor 2025

Zëdhënësi i Komisionit Qendror të Zgjedhjeve, Valmir Elezi, në konferencën e parë të ditës konfirmoi se procesi i votimit për zgjedhjet lokale në Kosovë ka nisur në të gjitha qendrat e votimit, përveç disa vonesave të izoluara në ndonjë vendvotim.

Sipas Elezit, sot janë hapur gjithsej 948 qendra të votimit me 2,625 vendvotime, prej të cilave 910 janë për votim të rregullt me gjithsej 2,571 vendvotime, ndërsa 38 qendra të veçanta janë hapur për votimin me kusht, me 54 vendvotime – një për secilën komunë.

Numri i qytetarëve me të drejtë vote është 2,025,105, të shpërndarë në 38 komuna të Republikës së Kosovës.

Po ashtu, Elezi njoftoi se materiali zgjedhor, përfshirë edhe fletëvotimet, është shpërndarë me kohë në të gjitha qendrat e votimit që në orët e hershme të mëngjesit.