Raportohet që vëllai i Gjestit ka humbur jetën në një aksident trafiku në Pejë

Pejë, 26 shtator 2025

Një aksident i rëndë trafiku ka ndodhur sot, në fshatin Bllagajë të Pejës, ku ka humbur jetën Eldion Kelmendi, vëllai i reperit të njohur Gjesti.

Lajmin e hidhur e ka konfirmuar edhe fshati Treboviq përmes një njoftimi zyrtar.

“Një aksident i rëndë ka ndodhur në fshatin tonë, përkatësisht afër fshatit Qungur, ku nga ky aksident ka mbetur i vdekur në vend vëllau i Gjestit, Eldion Kelmendi. Po ashtu në gjendje të rëndë është edhe një banor i fshatit tonë i cili tani ndodhet në spitalin e Pejës. Ngushëllime familjes Kelmendi nga Pavlani për këtë tragjedi të madhe!”, thuhet në njoftim.

Rastin e ka konfirmuar edhe Policia e Kosovës. Zëdhënësi i policisë për Rajonin e Pejës, Fadil Gashi, ka dhënë detaje për Tëvë1:

“Rreth orës 14:00 policia është njoftuar për një aksident në Bllagajë të Pejës. Në aksident ishin të përfshira një veturë dhe një katërçikletë. Policia ka dalë në vendin e ngjarjes bashkë me autoambulancë, ku mjeku ka konstatuar vdekjen e një personi. Një tjetër ka pësuar lëndime dhe është dërguar për trajtim në emergjencën e Pejës.”