Policia e Kosovës ka konfiskuar armë dhe municion të lidhur me rastin e Banjskës (E plotësuar)

Banjskë, 18 shtator 2025

Armë, radio-lidhje, municion dhe uniforma janë konfiskuar nga Policia e Kosovës në Korillë, në një rimorkio të vjetër për automjete, ka konfirmuar për mediat zëvendëskomandanti për rajonin e Veriut, Veton Elshani.
Ai ka deklaruar se ekziston dyshimi se gjërat e gjetura i përkasin N.V., i cili aktualisht ndodhet në arrati dhe është në kërkim në kuadër të rastit Banjska.
Ai nuk ka dhënë më shumë detaje, duke theksuar se policia do t’i bëjë ato të ditura më vonë. Përndryshe, konfiskimi i lidhur me rastin Banjska është kryer në prag të dyvjetorit të përplasjes në këtë fshat.
Më 24 shtator 2023 ka ndodhur një përplasje e armatosur ndërmjet Policisë së Kosovës dhe një grupi serbësh të armatosur, në të cilën kanë humbur jetën rreshteri i policisë Afrim Bunjaku dhe tre serbë nga veriu i Kosovës.
Tre serbë janë arrestuar, ndërsa ish-nënkryetari i Listës Serbe, Milan Radoiçiq, ka marrë përgjegjësinë për sulmin.
Një vit pas incidentit ka filluar procesi gjyqësor ndaj tre të arrestuarve, ndërsa gjykata ka refuzuar propozimin që gjykimi të vazhdojë në mungesë për 42 të akuzuar – 41 persona fizikë dhe një juridik – që akuzohen për pjesëmarrje në ngjarjet në Banjskë.