Partitë politike dhe kandidatët për kryetarë premtojnë investime për të ndryshuar jetesën

Prishtinë, 17 shtator 2025

Partitë politike të Kosovës po vazhdojnë tubimet elektorale në kuadër të fushatës parazgjedhore për zgjedhjet lokale të 12 tetorit.

Kryetari i Partisë Demokratike të Kosovës, Memli Krasniqi ka qëndruar në Klinë dhe Malishevë, ku ka prezantuar kandidatët e dy komunave përkatëse. Krasniqi ka kërkuar mobilizim të strukturave të partisë, për fitore të PDK-së në gjithë Kosovën.

Edhe Lëvizja Vetëvendosje ka vazhduar aktivitetin e vet politik, duke takuar përkrahës dhe qytetarë të vendit.

Kandidati për kryetar të Prishtinës, Hajrulla Çeku, ka realizuar takime me familjet Kasumi dhe Hoti, përkatësisht motrën e Ukshin Hotit.

Ndërkaq, kandidati për kryetar të komunës së Vushtrrisë, Xhafer Tahiri, në tubimin e mbajtur me qytetarë të disa lagjeve, ka premtuar kompensim të dëmve për bizneset lokale.

Ai gjithashtu ka premtuar modernizim urban të lagjeve të qytetit të Vushtrrisë.

Kurse kandidati për kryetar të Mitrovicës së Jugut, nga radhët e VV-së, Guxo-s dhe Alternativës, Faton Peci, ka dhënë zotime konkrete për qytetarët, duke thënë se ndryshimet do të ndihen qysh në gjashtë muajt e parë të qeverisjes së tij.

Peci tha se synon ta përmirësojë jetesën e qytetarëve të Mitrovicës, njëjtë si të fermerit që e realizoi gjatë mandatit të tij si ministër i Bujqësisë.